పొలిటికల్ వాయిస్ డాట్ కామ్,హైదరాబాద్, జూన్ 29, 2025: తెలుగు సినీ పరిశ్రమలో ప్రేక్షకుల అభిరుచి మారిందన్నది నిర్వివాదాంశం. రొటీన్ కథలకు దూరంగా, కొత్తదనం నిండిన కంటెంట్‌ను కోరుకుంటున్నారు. ఓటీటీల ప్రవాహంతో ఈ ధోరణి మరింత స్పష్టంగా కనిపిస్తోంది. సరిగ్గా ఇలాంటి సమయంలోనే, ‘కంటెంట్ ఈజ్ కింగ్’ నినాదంతో ప్రేక్షకులను పలకరించింది ‘చంద్రేశ్వర’ చిత్రం. మరి ఈ చిత్రం ఆశించిన అంచనాలను అందుకుందా? తెలుసుకుందాం.
కథేంటి?
నందివర్మ పర్వతం కింద పురాతన ఆలయం, అందులో నిక్షిప్తమైన నిధి ఉన్నట్లు పురావస్తు శాఖ ఎండీ చక్రవర్తి (నిళల్‌గళ్ రవి)కి తెలుస్తుంది. దీంతో ప్రొఫెసర్ బోస్ (బోసే రవి) నేతృత్వంలో 8 మంది సభ్యుల బృందాన్ని చంద్రగిరికి పంపిస్తాడు. అయితే గ్రామస్థులు వీరిని అడ్డుకుంటారు. గతంలో జరిగిన కొన్ని ఘటనల వల్ల గ్రామంలో మరణాలు సంభవించాయని, అందుకే ఎవరినీ అనుమతించబోమని స్పష్టం చేస్తారు.
ఎలాగోలా ఒప్పించి, బోస్ బృందం తవ్వకాలు ప్రారంభించినా, చీకటి పడిన తర్వాత గ్రామంలో ఎవరూ తిరగకూడదన్న కఠిన నిబంధన ఉంటుంది. దాన్ని ఉల్లంఘించిన వారు ప్రాణాలు కోల్పోతుంటారు. సరిగ్గా అదే సమయంలో చంద్రగిరికి సబ్ ఇన్‌స్పెక్టర్‌గా వచ్చిన గురు వర్మ (సురేశ్ రవి) ఈ మరణాల వెనుక ఉన్న వాస్తవాలను తెలుసుకోవడానికి దర్యాప్తు ప్రారంభిస్తాడు. ఈ క్రమంలో ఆర్కియాలజీ బృందంలోని అఖిల (ఆశ వెంకటేష్)తో ప్రేమలో పడతాడు. గురు వర్మ దర్యాప్తులో ఎలాంటి సంచలన విషయాలను కనుగొన్నాడు? ఆ ఊరిలో చావులకు కారణం ఎవరు? గుడిలో నిజంగానే నిధి ఉందా? అనే ప్రశ్నలకు సమాధానాలు దొరకాలంటే, సినిమా చూడాల్సిందే.
అదరగొట్టిన అంశాలు!
సంగీతం: ఫిలిక్స్ మాయాజాలం!
సినిమాకు ప్రధాన బలం జెరాడ్ ఫిలిక్స్ అందించిన నేపథ్య సంగీతం అనడంలో సందేహం లేదు. పురాతన రహస్యాలు, పురావస్తు తవ్వకాలు, ఉత్కంఠభరిత సన్నివేశాల్లో నేపథ్య సంగీతం ప్రేక్షకులను కుర్చీలకు కట్టిపడేస్తుంది. ఫిలిక్స్ సంగీతం దృశ్యాలకు, భావోద్వేగాలకు ఒక సహజమైన పొడిగింపులా అనిపిస్తుంది. ఎక్కడా అతి అనిపించకుండా, కథలో లీనమయ్యేలా చేస్తుంది.
ఇక పాటల విషయానికి వస్తే, శివుడిపై వచ్చే భక్తి గీతం సంగీతపరంగా ఒక అద్భుతం. ఈ పాట ప్రేక్షకులలో ఒక శక్తివంతమైన భావోద్వేగాన్ని రేకెత్తించి, గూస్‌బంప్స్ తెప్పిస్తుంది. ఇది కేవలం పాట కాదు, సినిమా మూల కథాంశమైన పురాతన ఆధ్యాత్మికతతో లోతైన అనుబంధాన్ని ఏర్పరుచుకునే ఒక అనుభూతి. అదేవిధంగా, రొమాంటిక్ పాట “అఖిల అఖిల” చాలా అందంగా స్వరపరిచారు. “ఈశ్వరా..! పరమేశ్వరా..!” పాట ప్రేక్షకులను పరవశింపజేస్తుంది. ఈ పాటలు పెద్ద హీరోల చిత్రాలకు సరిపోయే స్థాయిలో వైభవం, మాధుర్యం కలిగి ఉన్నాయి, ఇది విస్తృత ప్రేక్షకులను ఆకట్టుకునేలా బాణీలు కట్టడంలో ఫిలిక్స్ సామర్థ్యాన్ని చూపిస్తుంది. మొత్తంగా, జెరాడ్ ఫిలిక్స్ అందించిన సంగీతం సినిమా ప్రభావాన్ని పెంచడంలో ఒక అద్భుతమైన ఉదాహరణ.
నటీనటుల ప్రతిభ:
సబ్ ఇన్‌స్పెక్టర్ గురు వర్మ పాత్రలో సురేశ్ రవి చక్కటి ఆహార్యంతో ఆకట్టుకున్నాడు. తొలి సన్నివేశంలోనే అతని ప్రతిభను చూపించే ప్రయత్నం ప్రశంసనీయం. చంద్రగిరి వచ్చిన తర్వాత అతను చేసే ఇన్వెస్టిగేషన్ ప్రేక్షకులను సినిమాకు కట్టిపడేస్తుంది. పురాతన గ్రాంథిక భాష తెలిసిన నిపుణురాలిగా, ఆర్కియాలజీ బృందంలో కీలక పాత్ర పోషించే అఖిల పాత్రలో ఆశ వెంకటేష్ మెప్పించింది. అందంతో పాటు, ప్రేమికురాలిగా, బృంద సభ్యురాలిగా విభిన్న కోణాలను ప్రదర్శించే అవకాశం ఆమెకు లభించింది. చక్రవర్తిగా నిళల్‌గళ్ రవి, ప్రొఫెసర్ బోస్‌గా బోసే రవి, గ్రామ పెద్దగా నటించినవారు, ఇతర ఆర్కియాలజీ బృంద సభ్యులు తమ పాత్రల పరిధి మేరకు చక్కగా నటించారు.
సాంకేతిక మెరుపులు:
సాంకేతికంగా ఈ సినిమాకు బ్యాక్‌గ్రౌండ్ మ్యూజిక్ ప్రధాన బలం. జెరాడ్ ఫిలిక్స్ అందించిన నేపథ్య సంగీతం సినిమాను ప్రతి క్షణం నిలబెట్టింది. శివుడిపై వచ్చే ఓ పాట అయితే గూస్‌బంప్స్ తెప్పిస్తుంది. ‘అఖిల అఖిల’ పాట ఒక పెద్ద హీరోకు సరిపోయే స్థాయిలో ఉంది. ఆర్వీ సీయోన్ ముత్తు సినిమాటోగ్రఫీ పురాతన కాలానికి తీసుకెళుతుంది. ప్రారంభంలోని విజువల్స్ సినిమాపై ఆసక్తిని పెంచుతాయి. ఎడిటర్ నందమూరి హరి ఫస్టాఫ్‌లో కొన్ని సన్నివేశాలను కత్తిరించాల్సింది అనిపిస్తుంది. నిర్మాణ విలువలు కథకు తగ్గట్లుగా ఉన్నాయి.
దర్శకుడి దార్శనికత!
దర్శకుడు జీవీ పెరుమాళ్ వర్ధన్ ఈ కథ కోసం విస్తృత పరిశోధన చేశాడని తొలి షాట్‌లోనే అర్థమైపోతుంది. సనాతన ధర్మాన్ని సున్నితంగా స్పృశిస్తూ, ఎవరినీ బాధపెట్టకుండా ఆయన కథను చెప్పిన విధానం అందరినీ ఆకట్టుకుంటుంది. ఆర్కియాలజీ నేపథ్యంతో గతంలోనూ అనేక చిత్రాలు వచ్చాయి. అయితే ‘చంద్రేశ్వర’ ఆసక్తికరమైన కథ, స్క్రీన్‌ప్లేతో ప్రేక్షకులకు దృశ్యకావ్యాన్ని అందించాడు దర్శకుడు. ముఖ్యంగా ఇంటర్వెల్‌కు ముందు వచ్చే సన్నివేశం సినిమాకే హైలైట్. అది చూస్తున్న ప్రతి ఒక్కరికీ ఒళ్లు గగుర్పొడుస్తుంది.
సినిమా ప్రారంభ సన్నివేశమే ఒక గొప్ప చిత్రం చూడబోతున్నామనే అనుభూతినిస్తుంది. ఆ తర్వాత నందివర్మ, విజయ్ గౌడ ఎపిసోడ్ సినిమాకు ప్రాణం పోసింది. ఈ భాగం మిస్సయితే సినిమా అర్థం కాదు. మేకర్స్ పోస్టర్‌పై ‘ప్రారంభం మిస్ కాకండి’ అని ప్రింట్ చేయించి ఉంటే ప్రేక్షకుల ఆసక్తి మరింత పెరిగేది. ఒక రాజును ఓడించాలంటే వారి ఆచార వ్యవహారాలపై దెబ్బకొట్టాలనే డైలాగ్, సనాతన పద్ధతులను చూపించిన విధానం, హిస్టారికల్ ఎవిడెన్స్ వంటి పదాలు, విగ్రహాల మార్పిడి వంటి అంశాలు దర్శకుడి మేధస్సును స్పష్టం చేస్తాయి. గుడి విశిష్టతను తెలియజేసే ఎపిసోడ్, అదృశ్య ఖడ్గం, నిధి కోసం అఖిల చెప్పే నాలుగు రహస్య మార్గాలు వంటివన్నీ ప్రేక్షకులను సినిమాలో లీనమయ్యేలా చేస్తాయి.
విశ్లేషణ:
‘చంద్రేశ్వర’.. ఒక్క నిమిషం కూడా ప్రేక్షకులను బోర్ కొట్టించదు. సినిమా విడుదలైనప్పటి నుంచీ ప్రేక్షకుల చర్చల్లో నిలుస్తూనే ఉంది. ట్రైలర్, పాటలు చూపిన ఆసక్తితో పాటు, శివుడి నేపథ్యం, ఆర్కియాలజీ అంశాలు, పురాతన దేవాలయ కథ వంటి ప్రచారాలు సినిమాపై అంచనాలను పెంచేశాయి. ఈ సినిమా ఆ అంచనాలను అందుకుంది. కాస్త పేరున్న నటీనటులు గనుక నటించి ఉండి, ద్వితీయార్థంపై ఇంకాస్త శ్రద్ధ పెట్టి ఉంటే ‘కార్తికేయ 2’ తరహాలో ఈ సినిమా రికార్డులు సృష్టించేది అనడంలో సందేహం లేదు.
మొత్తం మీద, టికెట్ కొనుక్కుని థియేటర్ లోపలికి వెళ్లిన ప్రేక్షకుడిని ‘చంద్రేశ్వర’ నిరాశపరచదు. సరైన ప్రచారం చేసుకుంటే, ఈ ‘చంద్రేశ్వర’ బాక్సాఫీస్ వద్ద ‘విజయేశ్వర’గా నిలబడటం ఖాయం. ఒక అద్భుతమైన ఆధ్యాత్మిక, పురావస్తు అంశాలతో కూడిన థ్రిల్లర్‌ను చూడాలనుకునే వారికి ఈ సినిమా ఒక మంచి అనుభూతిని అందిస్తుంది.
తీర్పు:
ఆధ్యాత్మికత, ఉత్కంఠల మేళవింపు ‘చంద్రేశ్వర’!
రేటింగ్: 3.25/5
సినిమా పేరు: ‘చంద్రేశ్వర’
విడుదల తేదీ: 27 జూన్, 2025
నటీనటులు: సురేశ్ రవి, ఆశ వెంకటేష్, నిళల్‌గళ్ రవి, బోసే వెంకట్, ఆడుకాలం మురుగదాస్, జెఎస్‌కె గోపి తదితరులు
సంగీతం: జెరాడ్ ఫిలిక్స్
డిఓపి: ఆర్వీ సీయోన్ ముత్తు
ఎడిటర్: నందమూరి హరి
నిర్మాత: డా. రవీంద్ర చారి
డైరెక్టర్: జీవీ పెరుమాళ్ వర్ధన్
ట్యాగ్‌లైన్: ‘చంద్రేశ్వర’.. ‘విజయేశ్వర’
